भाषा ही ओळख

भाषा ही ओळख ?

सध्या भीमसेन जोशींच्या मुलांचे वारसा-हक्काचे भांडण चर्चेत आहे. एका गटाने दुसऱ्या गटाचे म्हणणे खोडून काढताना त्यांच्या मृत्युपत्राच्या भाषेवरून हे त्यांचे मृत्युपत्र वाटतच नाही असे म्हटले आहे. अशाच एका खटल्यात मृत्युपत्राची भाषा ही ती करणाऱ्याची वाटत नाही असे ठरून ते रद्द झाल्याचे ऐकलेले आहे.

मृत्युपत्र हा खरे तर एका कायदेशीर भाषेचा नमुना असतो. “सदर मृत्युपत्र हे मी स्वेच्छेने करीत असून पूर्ण होशोहवाल मध्ये करीत आहे” असे लिहिलेले असले तरी ते कसे कलुषित आहे हे त्यातल्या भाषेवरून समजते ? आणि तसे असेल तर ही “भाषा” मोठी छान लपण्याची जागा होईल. 

आता म्हातारपणी मी एकटाच उरलो आहे, मला हलवत नाही, चालवत नाही, औषधपाणी करणारा हाच मुलगा आहे, सबब हे घर मी त्याच्या नावे करीत आहे असे लिहून सुद्धा आपल्याला त्यातली अगतिकता सहजी समजू शकते. म्हणजे जे लिहिले त्याच्या नेमके वेगळे कसे पोचले ? आणि इथे ही भाषा तुम्हाला माझी ओळख देते आहे की आजकालच्या काळाची ओळख देत आहे ? शब्दांच्या एकामागोमाग येण्यात हा कुठला भलताच “अर्थ” ह्यात डोकाऊन गेला ? ही माझी ओळख, तुमची का भवतालाची ?

--------------------------------------------------